Comparte é unha rede formada por 19 entidades sociais, presentes en 11 países de América Latina e en Europa (Alboan). Estas entidades acompañan a 422 iniciativas económicas (rurais e urbanas) de produtores en exclusión social, organizadas en torno a cooperativas, asociacións, colectivos comunitarios. Benefician a 56.094 persoas (55% mulleres) campesiñas, indíxenas, urbanas marxinais, afrodescendentes. Trátase dunha rede que aposta por construír alternativas económico-produtivas social e ambientalmente responsables, para mellorar as condicións de vida das familias e comunidades de produtores en situación de exclusión. O obxectivo de Comparte é, polo tanto, axudar a que as iniciativas económico-produtivas que acompaña avancen na ampliación de escala nos seus territorios.
A rede Comparte está presente na Amazonía a través das entidades presentes neste territorio: SJPAM na tripla fronteira, SAIPE en Perú e CIPCA en Bolivia.
O Centro de Investigación y Promoción del Campesinado CIPCA acompaña desde 1971 en Bolivia os pobos indíxenas orixinarios campesiños e está especializado en deenvolvemento rural. Traballa en varias rexións do país, incluíndo a Amazonía sur (Departamento de Beni) e o norte amazónico.
Acompaña a familias, comunidades e asociacións de produtores no desenvolvemento de proxectos produtivos que xeren medios de vida dignos. As asociacións desenvolven actividades de provisión, transformación e comercialización en diversas áreas produtivas: leite e produtos lácteos no altiplano; cacao, mel, froitas amazónicas nas terras baixas; grans e derivados nas terras altas e vales; froitos e outros produtos da recollida nos bosques tanto nas terras baixas como nas altas; carne de camélido e outros produtos elaborados nas terras altas.
Na Amazonía Sur, CIPCA Regional Beni acompaña a Asociación Agroforestal Indígena da Amazonía Sur (AAIAS), formada por produtores de diversos produtos, entre eles o cacao autóctono. AAIAS aventouse na transformación do cacao en pastas e chocolates sen moito éxito debido ás debilidades e carencias da cadea de produción, non obstante, especializouse na comercialización de gran de cacao que se realiza a nivel nacional a empresas chocolateiras.
Na rexión do norte amazónico, CIPCA acompaña as asociacións de produtores e recolectores na transformación e comercialización de azaí, cacao e castañas para o mercado nacional e exterior.